Ağ Evdən çətin ayrılıq... - Obama vida nitqində göz yaşlarını saxlaya bilmədi
ABŞ prezidenti Barak Obama vida çıxışında ölkə vətəndaşlarını demokratiyanı müdafiə etməyə çağırıb. BBC-nin xəbərinə görə, Çikaqodakı çıxışı zamanı o, irqçilik və iqtisadi qeyri-bərabərliyi ABŞ demokratiyasının əsas təhdidləri adlandırıb.
Qeyd edək ki, Çikaqo Obama üçün doğma şəhərdir və prezident seçkisində qalib gəldikdə ilk çıxışını da buradan etmişdi.
Amerika lideri xəbərdarlıq edib ki, demokratiya dəyərlərinin ABŞ-da və dünyada zəifləməsi təhlükəsi var. Onun sözlərinə görə, demokratiya dəyərlərinin zəifləməsi dünyada vətəndaş və beynəlxalq müharibələrin yaranmasına gətirib çıxara bilər.
Obama bundan başqa İslam adı altında çıxış edən fanatiklərin və bəzi ölkələrdə hakimiyyətdə olan diktatorların hüququn aliliyi və insan haqlarına əməl olunma prinsiplərinə əsaslanan dünya nizamına təhlükə yaratdığını vurğulayıb: “Bu təhdidlər ABŞ üçün minalanmış avtomobil və ya raketdən daha böyük təhlükə yaradır”.
Obama çıxışında İŞİD terror qruplaşmasının darmadağın olunacağına əmin olduğunu bildirib.
Onun sözlərinə görə, 8 illik prezidentliyi dövründə ABŞ-ın yaşamaq üçün daha yaxşı ölkəyə çevrildiyini deyib: “8 il əvvəl desəydim ki, iqtisadi böhranı arxada qoyacağıq, avtomobil sənayesini yenidən dirçəldəcəyik, ölkə tarixində ən çox iş yeri, kubalılarla münasibətlərdə yeni səhifə açacağıq, bir güllə atmadan İranın nüvə proqramını bağlayacağıq, 11 sentyabr terror aktına görə məsuliyyət daşıyan şəxsi məhv edəcəyik, həmcinslilərin nikahına nail olacağıq, gözləntilərimizin şişirdildiyini düşünərdiniz” (APA).
Ağ Evin ilk qaradərili sahibi vida nitqində Rusiya və Çini ölkəsinin əsas rəqibləri adlandırıb. Eyni zamanda, qeyd edib ki, Moskva və Pekinin beynəlxalq arenadakı təsiri ABŞ-ın dünyadakı nüfuzu ilə müqayisə edilə bilməz.
Obama çıxışında həyat yoldaşı Mişel Obamaya xüsusi təşəkkür edib və göz yaşlarını saxlaya bilməyib.
55 yaşlı Obama 2008 və 2012-ci illərdə prezident seçilib. Yeni seçilmiş prezident Donald Tramp yanvarın 20-də and içərək səlahiyyətlərin icrasına başlayacaq. O, Obamanın bəzi islahatlarını ləğv edəcəyini bildirib.
Z.Ziya
