Saakaşviliyə qiyabi hökm: Tiflis məhkəməsi eks-prezidentə 3 il həbs cəzası kəsdi
Tiflis şəhər məhkəməsi Gürcüstanın keçmiş prezidenti, sonradan bu ölkənin vətəndaşlığından çıxarılan və hazırda Ukraynada yaşayan Mixeil Saakaşvilinin 3 il müddətinə azadlıqdan məhrum edilməsi barədə qərar qəbul edib.
Gürcüstan mediasının xəbərinə görə, sabiq dövlət başçısı ilə bağlı qərar hakim Georgi Arevadzenin sədrliyi ilə baxılan prosesin sonunda elan olunub.
Saakşvili bankir Sandro Qirqvlianinin qətlində günahlandırılan şəxslərin qanunsuz olaraq azadlığa buraxılmasında təqsirli bilinib.
İttiham aktına görə, Saakaşvili Konstitusiya Təhlükəsizliyi İdarəsinin o vaxtkı rəisi Date Axalya ilə qanunsuz əlaqəyə girərək “Gürcüstan Birləşmiş Bankı”nın əməkdaşı Sandro Qirqvlianinin işi üzrə mühakimə olunanların vaxtından əvvəl azad edilməsinə hüquqi əsas hazırlayıb və həmin şəxslər şərti cəza almaqla azadlığa buraxılıblar.
Keçmiş prezident ölkə Cinayət Məcəlləsinin səlahiyyətdən sui-istifadə maddəsi üzrə ittiham olunub və qiyabi olaraq mühakimə edilib (“Qruziya Online”).
Saakaşvili ilə bağlı Gürcüstanda digər cinayət işləri də qaldırılıb: dövlət vəsaitlərinin şəxsi ehtiyaclar üçün xərclənməsi, 7 noyabr 2007-ci il tarixli səhmlərin paylanması ilə bağlı vəzifə səlahiyyətlərini aşma, parlamentin deputatı Valeri Qelaşvilinin döyülməsi. 2014-cü ildə baş prokurorluq ona qarşı qiyabi ittiham elan edib.
Saakaşvili Georgi Marqvelaşvili prezident postuna gəldikdən sonra, 2013-cü ildə Gürcüstanı tərk edib. 2015-ci ildə o, Ukrayna prezidenti Pyotr Poroşenkonun məsləhətçisi olub. Qısa zamanda ona Ukrayna vətəndaşlığı verilib və Odessa vilayətinin qubernatoru təyin edilib. 2016-cı ildə vilayətin rəhbəri vəzifəsini tərk edən Saakaşvilinin Ukrayna rəhbərliyini hədəf alan açıqlamalarından sonra Poroşenko onu vətəndaşlıqdan məhrum edib.
Son zamanlar Saakaşvili Kiyevdə antihökumət aksiyaların təşkili ilə gündəmdədir. Baş Prokurorluq hesab edir ki, bu aksiyalar dövlət çevrilişi həyata keçirmək məqsədilə eks-prezident Viktor Yanukoviçin ətrafı tərəfindən maliyyələşdirilir. Bununla əlaqədar olaraq sabiq qubernator cinayət məsuliyyətinə cəlb edilib.
Xatırladaq ki, Qirqvliani qətli 12 il əvvəl törədilib. 2006-cı il yanvarın 28-də 28 yaşlı Qirqvliani dostu Levan Buxaidze ilə Tiflisin mərkəzindəki “Şarden-bar”a gəlmişdi. Həmin vaxt barda Konstitusiya Təhlükəsizliyi Departamentinin (keçmiş Dövlət Təhlükəsizlik Nazirliyi) rəhbəri Data Axalaiya, onun müavini Oleq Melnikov, DİN-in Baş müfəttişliyinin rəisi Vasili Sanodze, DİN-in İctimaiyyətlə əlaqələr xidmətinin rəisi Quram Donadze, daxili işlər nazirinin arvadı Tako Salakaiya, həmçinin Sandro Qirqvlianinin tanışı Tamara Maysuradze yeyib-içirmişlər. Söhbət zamanı Qirvqliani ilə Donadze arasında mübahisə düşür.
Və həmin gün axşam Qirqvlianinin cəsədi Tiflis yaxınlığındakı Okrokana qəsəbəsində tapılır. İş geniş rezonans doğurur və fevralda parlamentin müxalifətdən olan deputatları daxili işlər naziri Vano Merabişvilinin parlamentə gəlməsini və DİN-in şübhə altında qalan əməkdaşlarının vəzifədən azad edilməsini tələb edirlər. Buna cavab olaraq Merabişvili heç kimi işdən çıxarmayacağını bildirir.
Həmin il martın 6-da polis Konstitusiya Təhlükəsiliyi Departamentinin (KTD) 4 əməkdaşını - Gia Alaniya, Avtandil Apsiauri, Aleksandr Kaçava və Mixail Bibiluridzeni həbs edir. Onlar Qirqvlianini oğurladıqlarını və meşəyə apararaq döydüklərini etiraf edirlər. Dediklərinə görə, Qirqviliani onların əlindən qaça bilib və sonradan “meşədə azıb və 20 metr hündürlükdən dərəyə düşüb”.
Həmin vaxt Tiflisdə və digər şəhərlərdə keçirilən aksiyalarda minlərlə sürücü uzun müddət siqnal verərək DİN başçısına qarşı etirazlarını bildirmişdilər. Martın 16-da keçirilən etiraz aksiyasından sonra prezident Saakaşvili canlı efirlə mətbuat konfransı keçirmiş və Merabişvilini “yaxşı nazir” adlandıraraq vəzifəsindən çıxarmaqdan imtina etmişdi.
Mayda öldürülən Qirqvlianinin anası İrina Enukidze keçirdiyi mətbuat konfransında istintaqı ifşa etmişdi. Onun sözlərinə görə, susmaları müqabilində ailəsinə pul təklif ediblər: “Susmağım üçün mənə istədiyim hər hansı məbləği verə biləcəklərini dedilər. Əks təqdirdə məni susmağa məcbur edəcəklərini bildirirlər. Mənə həmçinin müxalifətlə hər hansı təmasda olmağı qadağan etdilər. Açıq şəkildə bu təkliflərin müəlliflərinə deyirəm ki, onlar çox böyük səhv edirlər”.
2006-cı ilin iyulunda qətldə şübhəli bilinənlərə məhkəmə 7 ildən 8 ilədək həbs cəzası kəsir. Prezident Saakaşvilinin həbs müddətini iki dəfə azaltması ilə onlar üç ildən sonra vaxtından əvvəl və şərti azadetməyə düşürlər.
Mühakimə olunanların azadlığa buraxıldığını eşidən Qirqvliani ailəsi İnsan haqları üzrə Avropa Məhkəməsinə müraciət edir. 2011-ci ildə Avropa Hökuməti Gürcüstan hökumətinin boynuna qoyur ki, mərhumun ailəsinə 50 min avro ödəsin.
2012-ci ildə Gürcüstanda hakimiyyət dəyişdikdən sonra DİN-in sabiq başçısı və keçmiş baş nazir Vano Merabişvili və digər yüksəkrütbəli şəxslər cinayət məsuliyyətinə cəlb edilir. Merabişvili rəsmi sənəddə saxtalaşdırmalara yol verdiyi üçün 3 il azadlıqdan məhrum edilir.
KTD-nin baş idarəsinin keçmiş rəis müavini Valerian Metreveli güc tətbiq etməklə xidməti səlahiyyətlərini aşdığı üçün, həmçinin bu iş üzrə cəza müddəti bitən KTD-nin birinci idarəsinin sabiq rəisi Giya (Geronti) Alaniya 4,5 il həbs cəzası alırlar...
Saakaşvili artıq Tiflis məhkəməsinin qərarını qanunsuz adlandırıb. O, “Facebook” səhifəsində bildirib ki, qərar Gürcüstanın keçmiş baş naziri, “Qazprom” un ən böyük səhmdarı, milyarder Bidzina İvanişvilinin göstərişi ilə verilib: “Düşünürəm ki, Poroşenko və İvanişvili bununla bağlı razılaşıblar. Bu qərar tamamilə qanunsuzdur və bütün beynəlxalq, milli normalara, sağlam düşüncəyə ziddir”.
P.S. Ey gidi dünya ... Həyat belədir: mühakimə edənlər vaxt gəlir mühakimə olunurlar...
Z.Ziya
