Anti-müsəlman...
Tramp Pakistana yardımları dayandırdı
ABŞ Pakistan hökumətinin ölkədəki terror təşkilatları ilə mübarizədə bacarıqsız olduğunu səbəb gətirərək, bu ölkəyə edilən bütün təhlükəsizlik yardımlarını dayandırıb.
Türkiyə saytlarının xəbərinə görə, ABŞ Dövlət Departamentindən bildirilib ki, “Pakistan “Hakkan” şəbəkəsi və “Taliban”a qarşı ciddi mübarizəyə başlayana qədər bizdən yardım ala bilməyəcək”.
Departamentin sözçüsü Hizer Nauert kəsilən yardımların həcmi barədə məlumat verməyib. Bundan başqa, Birləşmiş Ştatlar Pakistanı ölkədə dini azadlıqların kobud şəkildə pozulması səbəbilə xüsusi izləmə siyahısına da salıb.
Hezer Nauert bundan əvvəl ABŞ-ın Pakistana 255 milyon dollarlıq maliyyə yardımını dondurduğunu bildirmişdi.
Xatırladaq ki, prezident Donald Tramp üç gün öncə “Twitter” səhifəsində Pakistan haqda status yazmışdı: “Onlar liderlərimizin axmaq olduğunu düşünərək bizə yalan və hiylədən başqa heç nə vermədilər. Əfqanıstanda izinə düşdüyümüz terrorçular üçün təhlükəsiz zona yaradırlar”.
ABŞ prezidenti Donald Trampın “Twitter” hesabında Pakistan əleyhinə yazdığı yazılara bu ölkənin xarici işlər naziri Havaca Məhəmməd Asif sərt cavab verib.
“Sputnik Azərbaycan”ın xəbərinə görə, nazir terrorla mübarizədə Pakistanın ABŞ-a verdiyi dəstəyə görə çox böyük itkilərlə qarşılaşdığını söyləyib: “Cənab Tramp bizdən “Siz terrorla mübarizədə nə etdiniz?” deyə soruşur. İndi mən cavab verirəm. Sizə hərbi bazamızı verdik. Əfqanıstandakı əsgərlərinizin silah-sursat təminatı bizim torpaqlarımızdan keçib. Minlərlə sivil vətəndaşımız və hərbçimiz sizin başlatdığınız müharibənin qurbanı olub. Tarix bizə Amerikaya kor-koranə etibar etməməyi öyrətdi. Apardığımız mübarizə sizi qane etməyə bilər, amma bundan sonra ölkəmizin etibarı ilə alver etməyəcəyik”.
Xatırladaq ki, Tramp Ağ evə sahib olduqdan sonra əsas hədəfinə müsəlman ölkələri qoyub. Qüdsü İsrailin paytaxtı elan edən, Pakistana yardımı kəsən ABŞ İranı əsas düşməni elan edir və hazırda Türkiyə ilə körpüləri yandırmaqla məşğuldur.
Maraqlıdır ki, Tramp anti-müsəlman hərəkətlərində hazırda İslam dünyasının lideri roluna iddia edən Səudiyyə Ərəbistanı Krallığından və müsəlman dünyasının keçmiş aparıcı ölkəsi Misirdən dəstək alır.
ABŞ-da 3,5 milyon müsəlman yaşayır
Yeri gəlmişkən, ABŞ-da müsəlmanların sayı 3,45 milyona çatıb. Vaşinqtondakı Pyu Araşdırma Mərkəzinin xəbərinə görə, son 7 ildə ölkədə müsəlmanların sayı 700 min nəfər çoxalıb.
2050-ci ildə ABŞ-da müsəlmanların sayının 8,1 milyona çatacağı gözlənilir. 2015-ci ildə dünya üzrə müsəlmanların sayı 1,8 milyard olub. 2060-cı ilədək onların sayının 3 milyard olacağı ehtimal edilir.
Əsrin sonunda müsəlmanların sayının xristianlardan çox olacağı proqnozlaşdırılır.
E.Mirzə
