Virtual mübarizə
Qalib İBRAHİMOĞLU
Bir-iki müxalifət partiyasını çıxmaq şərtilə qalanlarının “fəaliyyəti” ancaq sosial şəbəkələrdə görünür. Kimisə söymək, başqasının bostanına daş atmaq siyasi mübarizədirsə, Allah kəssin belə mübarizəni...
Sosial şəbəkələr camaatımızın həyatına elə daxil olub ki, özünü onsuz təsəvvür edə bilməyənlər belə var. Bir də görürsən, biri evində hansı yemək bişirdiyini “facebook”da yazır. Digəri televizorun pultunu hara qoyduğunu yaddan çıxardığını paylaşır (deyən gərək, adam, bunu yazdığına canına bir əziyyət ver, pultu axtar də, kimsə gəlib sənin evində pultu tapası ha deyil). Ümumiyyətlə, sosial şəbəkələr bir xəstəliyə çevrilib. Ki, bu xəstəliyə də dərman yoxdur.
Bəzi partiya rəhbərləri işlərini ancaq sosial şəbəkələrlə həll edirlər. Bir-iki partiyanı çıxmaq şərtilə, qalanlarının “fəaliyyəti” də ancaq və ancaq sosial şəbəkələrdə görünür. Adamlar gündə 5-6 status yazmaqla özlərinin gündəmdə olduqlarını göstərmək istəyirlər. Kəsəsi, bəziləri real siyasi mübarizəni daha çox virtual siyasi mübarizəylə əvəzləyir. Kimisə söymək, kiminsə bostanına daş atmaq fəaliyyətdirsə, Allah kəssin belə fəaliyyəti.
Bu günlərdə AXCP sədri Əli Kərimli “facebook”da bir status paylaşaraq, xalqa müraciət edib. Orda da camaatı rəhbərlik etdiyi partiyaya üzv olmağa səsləyib. İndi siyasi arenada bu məsələ ciddi müzakirə olunmaqdadır. Biri belə müraciətin müsbət nəticə verəcəyini deyir, digəri bunu pisləyərək, müxalifətin virtual mübarizəsini heç bəyənmir.
Ağ Partiyanın sədri Tural Abbaslı deyir ki, siyasət virtualdan daha çox, real hadisə, mübarizədir. Üzvlərin cəlb olunması məsələsinə gəlincə, ilkin ünsiyyət üçün sosial şəbəkələr faydalı bir yerdir. “Ancaq sonradan həmin üzvü sosial şəbəkədən real siyasi fəaliyyətə adlada bilməyəcəksənsə, bu ancaq özünü aldatma olacaq. Sadəcə olaraq sosial şəbəkədə “bəyənmə” sayın artacaq və sənə elə gələcək ki, lidersən. Sabah isə mitinqinə bir statusuna yığdığın “bəyənmə” saylarından belə az adam gələcək. İnsanlar var ki, sosial şəbəkədə statuslarını 2-3 min adam bəyənir, ancaq mitinqə çağırdıqları adamlardan 200-300 nəfəri gəlir. Bu o deməkdir ki, sosial şəbəkədəki fəaliyyət bəzən reallıqla uyğunlaşmır”.
Bəzilərisə bu müraciətin arxasında tamam başqa məqsədin dayandığını iddia edir. Məsələn, bildirilir ki, bu müraciət daha çox mühacirətə getmək istəyənlərə hesablanıb. Son zamanlar onsuz da müxalifətin adı “mühacir ixracı”nda daha tez-tez hallandırılır. Belə ki, üzdə olan iri partiyaların rəhbərləri bu “siyasət”lə qaz vurub qazan doldururlar. Hesab edirlər ki, AXCP sədri də bu müraciətlə camaatı partiyaya virtual üzv qəbul edərək, bu bazarda daha çox qazanc əldə etmək istəyir.
Nəsə, müxalifətin “mühacir idxalı” söhbəti yenə gündəmə gəldi. Gəlirli sahədir, yoxsa, heç kəs bu bazara girməzdi...
