Söz ağızdan çıxdı, sənin deyil
Qalib İBRAHİMOĞLU
Vallahi və billahi yaxşı işdir, adam söz deyir, sonra da günahı jurnalistlərin üstünə yıxır. Ki, ay nə bilim, “dediklərimi konteksdən çıxarıblar”, “montajdır”, daha nələr, nələr...
İşığın, qazın qiymətinin qaldırılması camaatı qənaət rejiminə alışdıracaq. Bu isə birinci növbədə arıqlamaq istəyənlərin işinə yarıyacaq. Bir azdan ölkəmizdə kök adam tapmaq mümkün olmayacaq.
Bəziləri hər şeyin bahalaşdığı bir vaxtda camaata “maraqlı məsləhət”lər verir. Məsələn, o gün Milli Məclisin deputatı Hüseynbala Mirələmov qiymət artımına etiraz edənləri “ayağını yorğanına görə uzatmağı” məsləhət görüb. Deyib ki, azdır az ye, çoxdur çox ye. “Adamlar var çörək yemir, ət yemir, balıq yemir ki, forma saxlasın. Çox yemək insanı tez qocaldır”.
Odu-budu, sosial şəbəkələrdə Mirələmovun ünvanına deyilməyən söz qalmayıb. Deputatsa söylədiklərinin ayrı cür yozulduğunu iddia edir. Dediklərinin hamısının konteksdən çıxarıldığını deyən H.Mirələmov müsahibə verəndə, guya ki, zarafatyana şəkildə “indiki dövrdə xanımlarımızın çoxu fiqura saxlamaq üçün heç nə yemir-içmir” söyləyib. Jurnalistlə səmimi şəkildə söhbət edib, zarafatlaşıb, dönə-dönə də deyib ki, bu bir şakadır ha, amma kimə deyirsən? Jurnalist gözünə döndüyüm də zarafatı ciddi sayıb. Beləcə, dağdan ağır kişi el içində biabır olub.
Mirələmov deyir ki, qalmaqallı müsahibəsində çox şeylərdən danışıb. Amma jurnalist onun zarafatyana söylədiklərini verib. “Böyük Vətən müharibəsində ata-babalarımız nə qədər əziyyət çəkiblər. Çətinlik görüblər. Ac-susuz qalıblar, amma vətənə kömək ediblər. Əgər vətənimiz çətin durumdadırsa, onun yolunda canımızı da verməliyik. Hər bir azərbaycanlı belə düşünməlidir”. Ah, əməlli-başlı kövrəldim.
Ağsaqqal olanda nolar, ağsaqqal da zarafat edə bilər və edər də. Edəndə də onun zarafatını belə şişirtməkmi olar? Niyə onun ciddidən də ciddi şəkildə dediyi fikirləri vermirsiniz? Xata olub, adam zarafatla deyib ki, “az yeyək, ayağımızı yorğanımıza görə uzadaq”. “Adam var 1000 manat gəlir qazanır. Xərcləyir. Adam da var 200-300 manat əmək haqqı alır. Bu mənada demişəm ki, hər kəs ayağını yorğanına görə uzatmalıdır. Ailə büdcəsinə uyğun hərəkət etməlidir. Bu fikirlərimdə qəbahətli nə var axı, oturub-durub məni təhqir edirlər?! Əgər 1000 manat qazanıramsa, onu elə xərcləməyə çalışıram ki, bu ay üçün ailəmi saxlaya bilim”.
Zarafat bir yana, görəsən, bir çoxları niyə nə danışdıqlarının fərqində olmurlar ki, sonradan da belə halla qarşılaşırlar? Axı, jurnalistlərin, tutaq ki, Hüseynbala Mirələmovla alıb-verə bilməyəcəkləri nə var ki, onun söylədiklərini özü demiş, “konteksdən çıxarsınlar”, montaj etsinlər? Demək, söz söylənilib və söz də ağızdan çıxdı, day sənin deyil. Sözə sahib olmaq lazımdır...
