Dünən elə, bu gün belə... - Qalib İBRAHİMOĞLU
Zeynəb Xanlarova parlamentdə müharibə çağırışı etdi. İndi çoxunu bir sual düşündürür: Bir həftə əvvəl Ermənistan-Azərbaycan Sülh Platformasına qoşulmaq nə idi, indiki çıxışı nə?!..
Azərbaycan və Ermənistan qeyri-hökumət təşkilatlarının, ziyalılarının yaratdıqları Ermənistan-Azərbaycan Sülh Platformasına qoşulanların sayı günbəgün artmaqdadır. İndiyədək bu platformaya qoşulanlar barəsində heç kəs bir kəlmə də olsun söz deməyib. Amma ötən həftə SSRİ, Ermənistan SSR və Azərbaycanın Xalq artisti Zeynəb Xanlarovanın da bu platformaya qoşulması haqqında bəyanat verməsi yaman müzakirələrə səbəb oldu. Xalq artisti Flora Kərimova Zeynəb Xanlarova haqqında nələr danışdı, nələr...
Z.Xanlarova bəyanatında Ermənistan-Azərbaycan, Dağlıq Qarabağ münaqişəsinin sülh yolu ilə həllinin vacibliyinə, Azərbaycan və Ermənistan respublikalarının ərazi bütövlüyü və suverenliyinə, habelə hər iki dövlətin beynəlxalq səviyyədə tanınmış sərhədlərinə hörmət və dəstək ifadə edildiyini bildirərək, “BMT Təhlükəsizlik Şurasının qəbul etdiyi müvafiq qətnamələrin, habelə digər beynəlxalq təşkilatların qətnamə və qərarlarının icrasının vacibliyini dərk edərək, ATƏT Minsk Qrupunun münaqişənin sülh yolu ilə həlli istiqamətində fəaliyyətinin vacibliyini anlayaraq və bu fəaliyyəti dəstəkləyərək, erməni və Azərbaycan xalqlarının birgə yaşayışla əlaqədar ümumi ənənələrinə istinad edərək, münaqişənin həll olunmaması nəticəsində iki ölkədə yetişməkdə olan nəsillərin bir-biri haqqında təsəvvürlərinin yalnız müharibə kontekstində formalaşdığını təəssüflə qeyd edərək, xalqların sülh şəraitində birgə yaşayışını və uzun müddət davam edən münaqişənin həllini dəstəkləyərək”, bu təşəbbüsə dəstəyini ifadə edib, əsas məqsədi Ermənistan-Azərbaycan, Dağlıq Qarabağ münaqişəsinin ədalətli həllinə töhfə vermək olan Ermənistan-Azərbaycan Sülh Platformasına qoşulduğunu bildirmişdi.
Dünənsə xalq artisti parlamentdə elə çıxış edib ki, imzaladığı bu bəyanat heçə bərabər olub. Bir həftə əvvəl sülhdən danışan Z.Xanlarova dünən MM-də müharibə çağırışları edib: “Neçə illərdir ki, biz bu Məclisdə hamımız Qarabağ, Xocalı soyqırımı haqqında çıxış edirik. Ancaq özümüz deyib, özümüz eşidirik. O ildən bu tərəfə heç nə dəyişməyib. Birdəfəlik müharibə edək, onlar da qırılsın, bizimkilər də onsuz da qırılır. Bu danışıqlar mənə çatmır. Onsuz da qulaq asan, bu işlərə baxan yoxdur”.
Böyük sənətkar müharibə tərəfdarı olduğunu bildirərək, “gəlin birdəfəlik müharibə edək, torpağımızı alaq!” deyib. “Torpağımızı almaq üçün kimdənsə icazə almamalıyıq. 25 ildə gör nə qədər cavanlarımız qırılıb. Ya ölüm, ya qalım! Mən niyə ATƏT-ə qulaq asıram? Mənim evimə giriblər, mən onların evinə girməmişəm, torpağını almamışam”.
Xalq artisti ömrü boyu sülh tərəfdarı olduğunu, amma 25-30 ildir bu vəziyyətin dəyişməməsindən çox narahatlığını bildirərək, bildiyini edən dəyirmanı birdəfəlik ermənilərin başına vurmağın vaxtının çatdığını deyib: “Mənim ürəyimdən gələn budur. Əgər mənim evimə basqın ediblərsə, mən evimi xilas etməliyəm. 25 ildir gözləyirik, bəlkə 50 il də gözləyək? Allah vurub onları, vuruşmaq, almaq lazımdır. Qurtardı!”
Zeynəb Xanlarovanı bu çıxışına görə dəstəkləyənlər də var, “bir həftə əvvəl imzaladığı nədi, indi söylədikləri nə” deyənlər də. İkincilər birincilərdən çoxdur...
