Samur çayının bölünməsi üzrə Azərbaycan-Rusiya Birgə Komissiyasının iclası keçirilib

14.06.2019 16:56
165
Samur çayının bölünməsi üzrə Azərbaycan-Rusiya Birgə Komissiyasının iclası keçirilib

Samur transsərhəd çayının su ehtiyatlarının bölünməsi üzrə Azərbaycan-Rusiya Birgə Komissiyasının XVI iclası keçirilib.


İclas Bakı şəhərində təşkil olunub. Azərbaycan Meliorasiya və Su Təsərrüfatı Açıq Səhmdar Cəmiyyətindən verilən məlumata görə, komissiyanın Azərbaycan tərəfdən həmsədri, cəmiyyətin sədr müavini Zakir Quliyevin rəhbərliyi ilə keçirilən iclasda Səhmdar Cəmiyyətin, Azərbaycan Respublikası Xarici İşlər, Ekologiya və Təbii Sərvətlər nazirliklərinin, Əmlak Məsələləri Dövlət Komitəsinin və Dövlət Sərhəd Xidmətinin nümayəndələri iştirak ediblər.


Görüş zamanı Samur çayının su ehtiyatlarının iki ölkə arasında bölüşdürülməsi, ekoloji axınların təmin olunması, məlumat mübadiləsi və digər məsələlər müzakirə edilib, növbəti görüşə kimi görüləcək tədbirlər müəyyənləşdirilib. İclasın yekunu üzrə ikitərəfli protokol imzalanıb.


Qeyd edək ki, sazişə əsasən komissiyanın iclası hər dəfə bir ölkədə olmaqla ildə iki dəfə keçirilir.


Birgə komissiya “Azərbaycan Respublikası Hökuməti və Rusiya Federasiyası Hökuməti arasında Samur transsərhəd çayının su ehtiyatlarının səmərəli istifadəsi və mühafizəsi sahəsində əməkdaşlıq haqqında” 2010-cu il sentyabrın 3-də imzalanan Sazişə əsasən yaradılıb. 


Ekspress.az