"Pensiya fondu"nun büdcəsi artırılır

21.06.2019 13:12
71
"Pensiya fondu"nun büdcəsi artırılır

"Dövlət Sosial Müdafiə Fondunun büdcəsi 2019-cu ildə 200 mln manat (5,1%) artırılıb. Artırılan məbləğ nəticəsində Fondun dövlət büdcəsindən asılılığının səviyyəsi 38,3%-dən 32,8%-ə qədər azalması gözlənilir ki, bu da onun maliyyə dayanıqlılığının təmin edilməsində xüsusi əhəmiyyət kəsb edir".


Bunu Milli Məclisin iqtisadi siyasət, sənaye və sahibkarlıq komitəsinin iclasında çıxışı zamanı Hesablama Palatasının sədri Vüqar Gülməmmədov bildirib. 


Onun sözlərinə görə, dövlət başçısı tərəfindən əməkhaqqlarının ayrı-ayrı sahələr üzrə 20-40% artımı ümumilikdə 18,7%-lik məcburi dövlət sosial sığorta haqları üzrə artım üçün əsas mənbə hesab ediləcək.


“2019-cu ilin dövlət büdcəsi büdcə qaydaları əsasında tərtib olunur. Burada büdcənin yuxarı həddi müəyyən olunub. Dövlət Sosial Müdafiə Fondunun büdcəsinin 200 mln artması onun yuxarı həddində həyata keçirilir. 2019-cu ilin büdcəsi qəbul olunarkən 3 faizlik yuxarı hədd qoyulsa da tam həcmdə yox, 2,7-2,8 faiz həcmində idi. 200 milyon manat vəsaitin artması büdcə qaydalarının pozulmasına gətirib çıxarmayıb (report). Dövlət Sosial Müdafiə Fondunun büdcəsində 150 milyon manat azaldılıb, büdcənin özündə də bu məbləğ artırılır və hüquq-mühafizə orqanlarının xərclərinə yönəldilir. Dövlət Sosial Müdafiə Fondunda artım əməkhaqqlarının gəlirlərinin artmasından ibarət olur”, - deyə V.Gülməmmədov əlavə edib.


Palata sədri cari ilin 5 ayında da Vergilər Nazirliyi tərəfindən 5 aylıq gəlirlərin uğurla icra olunduğunu da əlavə edib: “Xüsusən fiziki şəxslərin gəlir vergisi sahəsində uğur əldə edilib. Fiziki şəxslərin gəlir vergisi sahəsində büdcəni özündə də artım nəzərdə tuta bilərdik. Hal-hazırda artım nəzərdə tutulmadığı bir şəraitdə bu yalnız dövlət büdcəsinin kəsirinin maliyyələşməsi üçün əlavə mənbə yaradacaq. Bu, Dövlət Neft Fondundan transfertin azalmasına səbəb ola bilərdi. Bu isə büdcənin keyfiyyət göstəricilərinə, yəni, neftdən asılılığın rəqəminin azalmasına gətirib çıxara, 1 il büdcə neft kəsirinin də azalmasına səbəb ola bilərdi”.


Ekspress.az

  • SON XƏBƏR
  • TREND